الله على الربطـة يعيـن الصقاقيـر

الله على الربطـة يعيـن الصقاقيـر اللـي تعـد الريـش وتعـد الأيـام

يقطّعـون اوقـا تـهـم بالتسايـيـر وشوف المقانيص القديمـة بالأفـلام

تشوف راعي الطير عاف المظاهيـر ومن شوفت القمرا وعـدً لهـا صـام

قعد مابين أهـل البنـاء والنجاجيـر وفي دورته ماهتم في فـرق الاقيـام

يبغي مقيظه مايجـي فيـه تقصيـر من خوف لوم اللي إلـى شافهـا لام

ويجيب لطيـوره حليـب العصافيـر إلـى تباطـى حذفـه لريشـة العـام

يويق صبح وظهر والعصر وعصير ويظهر عشاها عقب ماجا من الـزام

يقسـم علفهـا بالتسـاوي بتقـديـر وقدامهـا كنـي بـه يكسـر عظـام

كنـه تزيـده لاتعـشـت دنانـيـر والى أدرجت مايفتكر في هـل الشـام

تمسي وهو مامسى روابـع وتفكيـر يرمي به الهاجس على جال الأحـلام

ويذكر مكـان داجـه العـام بالخيـر ويطري علية أزين مقانيصه أعـوام

وذيك الوناسه والقنـص والمشاويـر وخوة رجال هل مقانيـص وحشـام

الله جمعهـم كلهـم فــي سيـايـر وقدامهـا فرقهـم ظـروف وأحكـام

على الوعد (ف)أول محطة طوابيـر وفي كل موتر عزبـة فـوق قسـام

فلان ينطر له رفيـقً علـى السيـر وفلان خذ للربع مـن كـل الأنعـام

وفلان عند البنشري يركـب اسبيـر وفـلان قدامـه يركـب لـه اسيـام

وفلان عجـل ولايبـي زود تأخيـر شغـل وراح وواعـد الربـع قـدام

فـي شفهـم ماحسبـوا للمخاسـيـر لو زادت أصفـار مياسيـره أرقـام

في حلها (ف) الطيب ماهـو بتبذيـر يراقبـون الله وأحـكـام الإســلام

وراعي القنص عمن يسب القنص غير شف ذا إلى ذهّن وشف ذا إلـى نـام

يغط غطة ذ يـب وان ذهّـن يطيـر ويقوم عاد اللـي معـه مابعـد قـام

ويشب في اللي قبل يحتـاج تكسيـر فـي ليلـة مافـاد فيهـا التلـطـام

وفيما تفـوح ادلال صفـرٍ مباهيـر خـذ ركعتيـن بالخـفـا لله قـيـام

والى قضى ركـد دلالـه مساطيـر وأذن ولا يحتـاج للـربـع قــوام

تمالـوا وركبـوا وراحـوا مداويـر للي يـروّع زولهـا كـل ضرغـام

برقا الجناح اللي إلـى قامـت تسيـر أول مايطـري للـربـوع التشـيـام

تشاوروا وصلـوا لخيـر الاشاويـر وهدوا غرام الشـارده عقـب لـزًام

هدوا معيـدً عوقهـا عقـب تذييـر أصله وحش مطروح في ديرة ألغـام

مغتـر ولا طبعـه بطبـع المغاتيـر من يوم رب ووالـف الـدس ماحـام

مطلق عمد صافي وسيـع المناخيـر كن دق صـدره دقـة شمـاغ بسـام

عود ويخالى به على الفرخ والجيـر جسر وعلى المدخال في الجول عـزام

أعطاهم الصيده بعـد ماخـذ السيـر وعلم فـروخ كـان تحتـاج عـلام

هدوا وصادوا والهدف هـدة الطيـر ماهمـهـم لـدهـام ولا لـعــزام

تبدلوا (ف)الزرع شـوف النواويـر وتبدلوا في الزحمـة فيـاض وخيـام

على لحم صيد وحليـب المصاغيـر تبدلـوا بالسيـر والقـيـد درهــام

وسجوا من همـوم البلـد والفواتيـر وهموم الأسهم ذاك عارض وذا سـام

وتريحوا من قولة(ن) صـار تفجيـر ومن شوفة الفتنة ومن كذب الإعـلام

نشوف تفجيـرات ونشـوف تعزيـر ولاجهلنـا ماحصـل بعـد صــدام

لكن شوف وحـر جـوف ومقاديـر وش الجهد غيـر الدعـاء والتهشـام

الزبـدة ان البرمـن غيـرة اخـيـر لاصار مع ربـع صقاقيـر وحشـام

وبعض الرجال اللي يلوم الصقاقيـر ماهـو يعـد الريـش ويعـد الأيـام

تراه مربـوطً مثـل ربطـة الطيـر ويقصر جريره حده البيـت والـزام

رووووووعه عساك على القوه ودمت بود

الكود:: دمت بوود

مشكوره على المتابعه

وللاسف نسيت انسب القصيده لصاحبها

شاعر المليون

» ما روي عن رسول الله (ص)
» الله يسامح غلاك ويلعن الحاجه
» الله المستــــعان ارسل المووضوع بكل منتدى وكل بريد
» كيف تعالج نفسك بطاقة الشفاء الموجودة في أسماء الله الحسنى